香港麻雀計分：使用教學同番數計法
呢頁分兩部分：第一部分教你由開枱用到收皮；第二部分解釋本網站點樣將「番數」變成分數，包括半辣上、辣辣上、全銃、半銃同自摸點計，等你同枱友開打前可以先對好數。
第一部分：使用教學
1. 揀玩法、開枱
- 用手機打開 hkmahjong.app，撳「即刻開枱」。
- 喺「預設玩法」揀一款，例如「3番4 半辣上」。畫面會顯示簡介，例如「全銃 · 3番起糊 4 · 8番滿糊 32」。
- 入到「玩法設定」可以逐項改：人數（三人／四人）、全銃／半銃、半辣上／辣辣上、起糊番數、滿糊番數、自摸倍數。下面嘅計分表每一格都可以直接改，自摸分數會自動跟住乘。
- 「莊家」部分可以揀要唔要紀錄莊家及圈風，同埋流局時過唔過莊。
- 想下次再用，撳「存做我嘅玩法」（只存喺你部手機，最多 12 套）。
- 撳「確定開枱」，系統會產生一條秘密連結。
2. 分享畀同枱朋友
撳分享列嘅「WhatsApp 分享」或「複製連結」，丟入群組。朋友撳開就會見到同一張枱，顯示「只睇」，分數自動更新。座位名可以喺「⋯」→「改名」修改，每位仲可以揀個公仔頭像。
秘密連結只應該畀同枱人；公開分享請用「戰績圖」或「唯讀賽果頁」。
3. 入食糊
- 撳食糊嗰位嘅座位，彈出「食糊!」視窗。
- 左邊揀番數。唔肯定幾多番？撳「番數 ?」打開番數小幫手，逐個撳番種（例如門前清 1、混一色 3），系統自動加埋。
- 右邊揀出銃者，或者揀「自摸」。
- 下面會顯示呢鋪分數同出銃者要付幾多，確認無誤撳「確定」。
一炮多響：撳視窗頂部「一炮多響」，揀出銃者，再加第二、第三位食糊，每人可以揀唔同番數。 詐糊：喺番數一欄撳「詐糊」，再揀詐糊番數（預設滿糊）。 流局：撳枱中間「流局」，分數唔變，按設定過莊或者連莊。 打錯：撳左上角 ↩ 還原；「⋯」選單入面有重做。
4. 莊家同圈風
枱中間會顯示例如「東圈南風」，座位上有「莊」字。莊家食糊就連莊，其他人食糊就過莊，四個莊做完自動轉圈。需要手動調整，撳頂部「莊」按鈕，可以改圈風、改邊個做莊。
5. 語音報分
撳頂部 🔇 變成 🔊，食糊時會用廣東話讀出「南家 8番自摸」「西家 5番食糊，北家出銃」。語音、動畫同震動每部機自己揀，主家入數之後其他人部機會同步播放。部分手機要先撳一下畫面先可以發聲；冇粵語聲請喺手機「文字轉語音」設定下載廣東話語音。
6. 換機記分
- 舊手機（主家）撳「⋯」→「交出記分（換機碼）」，記低 6 位數字。
- 新手機打開同一條秘密連結，撳「⋯」→「我嚟記分（換機／換人揸機）」，輸入 6 位數。
- 新手機變主家，舊手機自動轉做「只睇」。
換機碼 10 分鐘內有效，用完即廢。
7. 收皮找數
撳頂部「莊」→「收皮找數」，會列出每人輸贏同最少轉賬次數嘅找數方案，可以一撳複製 WhatsApp 過數文字，或者分享戰績圖、唯讀賽果頁。
第二部分：番數點樣變分數
起糊、滿糊同底數
「3番4」即係 3 番起糊、起糊值 4；「二五雞」起糊值 8；「五一」16；「一二蚊」32（預設全部 3 番起糊、8 番滿糊）。番數最少由起糊計起；超過滿糊一律當滿糊計。番種表入面嘅「滿貫牌」會直接當滿糊。
半辣上同辣辣上
- 辣辣上：每加一番，分數乘 2。
- 半辣上：由起糊值（底）開始，順序係底嘅 1、2、3、4、6、8、12、16 倍……即係第一番先翻一倍，之後每加兩番再翻一倍，中間嗰番取兩者之間嘅中間值。
以「3番4」為例（食糊分數）：
| 番數 | 3 | 4 | 5 | 6 | 7 | 8 |
|---|---|---|---|---|---|---|
| 半辣上 | 4 | 8 | 12 | 16 | 24 | 32 |
| 辣辣上 | 4 | 8 | 16 | 32 | 64 | 128 |
「二五雞」半辣上就係 8、16、24、32、48、64，如此類推。以上只係預設，計分表每格都可以自己改。
出銃：全銃同半銃
- 全銃：出銃者一個人付晒食糊分數。例：3番4 半辣上，5 番出銃，出銃者付 12。
- 半銃：出銃者付一半，另外一半由其餘兩家平均分攤。例：同樣 12 分，出銃者付 6，另外兩家各付 3。
- 出銃者包自摸：開咗之後，即使玩半銃，都由出銃者一個人付晒食糊分數。
自摸
自摸總分 ＝ 食糊分數 × 自摸倍數（預設 1.5），由其餘三家平均分攤。例：5 番自摸，食糊分數 12，總分 18，三家各付 6。三人枱就由兩家分攤。
一炮多響
每位食糊者按自己番數計，出銃者逐位付。
詐糊
詐糊者要賠畀其餘每一位「詐糊番數」嘅食糊分數；開咗「詐糊賠位位自摸」就改為每位賠自摸總分。例：3番4 半辣上，詐糊按 8 番計，詐糊者賠每家 32，合共 96。
連莊加一番（可選）
喺「設定」打開之後，莊家連莊期間食糊，每連一次額外加一番。例：莊家連咗 2 次，今鋪 4 番食糊，會當 6 番計。
常見番種（番數小幫手）
平胡、門前清、自摸、無花、門風、圈風、搶槓、海底撈月、槓上自摸各 1 番；正花每隻 1 番（最多 2 隻）；箭刻每組 1 番（最多 3 組）；混一色、對對胡、花糊各 3 番；小三元 5 番；清一色 7 番；大三元、小四喜各 8 番；字一色、大四喜各 10 番。各地番種略有不同，小幫手只作參考，最終番數以枱上共識為準。
有任何計法同你哋枱唔同，歡迎電郵話我知：marjoruse@gmail.com。打跑馬仔／碰槓牌？請用姊妹網站 跑馬仔麻雀計分。